بۆ/رِاى گشتى

له‌كاتیَكدا زۆریَك له‌به‌رپرسانى كوردستان شانازى به‌ئازادى رِاده‌برِین و كارى رِۆژنامه‌گه‌رى ده‌كه‌ن. به‌ڵام به‌به‌رچاوى هیَزه‌ ئه‌منیه‌كانى و له‌كۆلیَژى ئادابى زمانى ئینگلیزى له‌ناو پایته‌ختى هه‌ریَمى كوردستان خویَندكارى رِۆژنامه‌نووس(سه‌رده‌شت عوسمان)یان رِفاندو دواتریش له‌موسڵ به‌تیرۆركراوى دۆزرایه‌وه‌.

 ویَرِاى ئه‌وه‌ى ئه‌م كرده‌وه‌ ترسنۆكانه‌ زۆر به‌توندى ئیدانه‌ ده‌كه‌ین، خودى سه‌رۆكى هه‌ریَم به‌به‌رپرسیارى سه‌ره‌كى ده‌زانین له‌تیرۆركردنى ئه‌م خویَندكاره‌، چونكه‌ له‌ژیَر ده‌سه‌ڵاتى حیزبه‌كه‌ى ئه‌و رِفاندن و تیرۆركردنه‌ روویداوه‌و چاوسوركردنه‌وه‌ شه‌ق تیَهه‌ڵدانیش تائیَستاش به‌رده‌وامه‌. بۆیه‌ به‌م بۆنه‌ خه‌مناكه‌وه‌ گروپى رِۆژنامه‌نووسانى بیَسنوورى كوردستان ویَرِاى ئه‌وه‌ى هاوخه‌مى به‌كه‌سو كارو هاورِیَكانى سه‌رده‌شت عوسمان و سه‌رجه‌م ئازادی دۆستان رِاده‌گه‌یه‌نین داواش له‌سه‌رۆكى هه‌ریَمى كوردستان ده‌كه‌ین، رِوونكردنه‌وه‌ى پیَویست بدات له‌باره‌ى تیرۆركردنى ئه‌م خویَندكاره‌ رِۆژنامه‌نووسه‌وه‌، چونكه‌ ئه‌گه‌ر رِوونكردنه‌وه‌ى پیَویست نه‌دات و بكوژه‌كان ئاشكرا نه‌كات. ئه‌وا به‌دڵنیاییه‌وه‌ ئیَمه‌ هه‌ڵویَستى ترمان ده‌بیَت.

 هه‌ربه‌مبۆنه‌وه‌یه‌وه‌ له‌سه‌ر سایتى گروپ كه‌مپینى ئیدانه‌ كردنى كاكه‌ سه‌رده‌شتى جوانه‌ مه‌رگ رِاده‌گه‌یه‌نین ئیَوه‌ش به‌په‌یامه‌كانتان به‌شداربن.

بۆ/سه‌رۆكى هه‌ریَم

بۆ/سه‌رۆكى په‌رله‌مان

بۆ/سه‌رۆكى حكومه‌ت

بۆ/كونسوڵى گشت ووڵاته‌ بیانیه‌كان هه‌ریَمى كورستان

گروپى رِۆژنامه‌نووسانى بىَ سنوورى كوردستان