شۆڕش عزیز سورمێ
دوای ڕاگەیاندنی سەربەخۆیی كۆسۆڤا، لەسەر زاری (هاشم تاچی)ـی سەرۆکی حكوومەتی ئەو وڵاتە لە بەردەم پەرلەمانی كۆسۆڤا لە 17ـی مانگی شوباتی 2008ـدا، كۆسۆڤا بوو بە دەوڵەتێکی سەربەخۆ بە بێ خواستی سربەکان. جگە لە وەدەستهێنانی ئەو سەربەخۆییە، كۆسۆڤا سوورە لەسەر ئەوەی لە یەکیەتیی ئەورووپا و هاوپەیمانەتیی باکووری ئەتڵەسیدا ببێت بە ئەندام. وەک ئاشکرایە، 69 دەوڵەت لە نێویاندا ‌دەوڵەتە یەکگرتووەکانی ئەمەریکایش ددانی بە سەربەخۆیی كۆسۆڤادا نا، ئەمە جگە لە 22 دەوڵەتی ئەورووپایی ئەندام لە یەکیەتیی ئەورووپادا. هەرچی سربستان و ڕووسیان، ئەوە ئەم ڕاگەیاندنەیان پێ قبووڵ نەکرا، ئەوە بوو سربیا لە مانگی تشرینی یەکەمی 2008ـدا، بە ڕەزامەندیی کۆمەڵەی گشتیی نەتەوە یەکگرتووەکان، پەنای بردە بەر دادگەی نێودەوڵەتی، لە هەمان کاتدا (كۆسۆڤا)ـیش پەنای بردە بەر دادگەی نێودەڵەتی لە هۆڵەندا بەمەبەستی وەرگرتنی زانیاری سەبارەت بە بارودۆخی بڕیارەکە لە ڕووی سیاسی و یاساییەوە بۆ ئەوەی بزانێت تا چەند بڕیاری سەربەخۆیی كۆسۆڤا یاساییە لە كیشوەری ئەورووپا.
دواتر لە ڕۆژی 22ـی ئەم مانگەدا، دادگەی نێودەوڵەتی بە تەواوەتی پشتگیریی لە بڕیاری سەربەخۆیی كۆسۆڤا کرد، بەمەیش شەرعییەتی تەواو درا بە سەربەخۆیی نیشتیمانی ئەو گەلە موسڵمانە لەسەر ئاستی نێودەوڵەتیدا بۆ ئەوەی بتوانن بە ئاشتییانە لەسەر خاکی باب و باپیرانیان بژین.
بە هەرحاڵ كۆسۆڤا هەرچەندە لە ڕووی جوگرافییەوە بچووکترین دەوڵەتە لە چاو دەوڵەتەکانی دەوروبەری، بەڵام بە دوادەوڵەتی ئەورووپایی سەربەخۆ دادەنرێت.
گەر بێت و بەراوردێک بکەین لە نێوان دۆزی كۆسۆڤا و دۆزی کورد، ئەوە لە ڕووی مێژووییەوە دەبینین مێژووی کوردستان زۆر درێژترە لە مێژووی كۆسۆڤا، بە تایبەتی لە ڕووی ئەو ئازار و ئەشکەنجە و دەربەدەرییە و تێکۆشان لە پێناو سەربەخۆیی کە میللەتی کورد بینیویەتی و بە دەستییەوە ناڵاندوویەتی، بەڵام لە هەمان کاتدا لە زۆر ڕووەوەیش لەیەک دەچن، چونکە چ ئەوان و چ ئێمە، لە ڕابردوودا لە ژێر دەستەڵاتی عوسمانییەکاندا بووین، بۆیە ئەو ئازارەی ئەوان بینیویانە، هەمان ئازاری ئێمەی کورد بووە.
جگە لەمە، با بگەڕێینەوە بۆ ساڵانی نەوەدەکان چۆن کورد هەڵاتن و دەربەدەری و پەنابەری لە کۆڕەوەکە بە خۆیەوە بینی، کۆسۆڤاییەکانیش بە هەمان شێوە لە دەست سربەکان دەربەدەری و ئازارێکی زۆریان بینی و هەر لەو ماوەیەدا قوربانییەکی زۆریان دا.
کاتێک ئێمەی کورد لەسەر شاشەی تەلەڤزیۆنەکان دیمەنی هەڵاتنی كۆسۆڤاییەکانمان دەبینی، دیمەنی هەڵاتنی خۆمانمان وەبیر دەهاتەوە. ئەمانە هەمووی خاڵی هاوبەشن لە نێوانماندا، بەڵام ئەو خاڵەی کە ئێستا لێکمان جیا دەکاتەوە، ئەوەیە کە ئەوان توانییان سەربەخۆیی خۆیان وەدەست بهێنن و ببنە دەوڵەتێکی سەربەخۆ و بە پشتگیریکردنی زۆربەی زۆری دەوڵەتانی ڕۆژئاوا و بگرە وڵاتانی ئیسلامیشەوە.
لێرەدا دەپرسین ئایا گەر کوردستان سەربەخۆیی خۆی ڕابگەیەنێ، ڕۆژئاوا هەمان هەڵوێستی دەبێ؟